ملخص كتاب دع القلق وابدا الحياه 

◀️️عيش اللحظة 

ناس كتير عايشة في الماضي ومش قادرة تعملmove on وناس كتير شايله هم المستقبل ومش عارفين يعيشوا في الحاضر ولا يستمتعوا، وفي ناس من كتر التفكير في الماضي والخوف من المستقبل مش قادرة تعمل أي أنجاز.

 في البوست ده هقولك على خطوات تمشي عليها وبإذن الله هتساعدك تعيش اللحظة 💜

1ـ الماضي 

🔵عملت ذنوب كتيير: ناس كتير بتقعد تقول أنا مش عارف أعيش الحاضر لإني عملت ذنوب كتير طيب ما أنتَ عارف إنك عملت ذنوب كتير ولمت نفسك كتير وشايل هم الذنوب اللي عملتها في الماضي طيب متبطل تعمل الذنوب دي في الحاضر وتصلي ركعتين توبة وتعزم على عدم الرجوع للذنوب دي وربنا هيبدلك بدالها حسنات وخليك عارف إن التوبة تجب ما قبلها، ربنا غفور رحيم وهيغفرلك فمتشكش ولو للحظة في لطف الله وكرمه، خليك عارف إن دي لعبه من لعب الشيطان إنه بيخليك تيأس إنك تتتوب وبيصورلك إنك أسوء إنسان لكن الحقيقة إن كل الناس بتذنب وكل بني آدم خطاء. 

🔴الناس عارفه كل أخطائي🤦🏼‍:

 بتقعد تفكر وتقول مينفعش أتحسن ولا أغير من نفسي؛ لإن الناس عارفة أنا عملت أيه زمان 🥺 ملكش دعوة بالناس أنتَ غلطت زمان لإن تفكيرك زمان غير تفكيرك دلوقتي، زمان مكنتش تعرف اللي تعرفه دلوقتي... ابدأ طور من نفسك ومتشلش هم الناس هما هينسوا تلقائيًا لما يشوفوك بقيت إنسان تاني ولو حد فكرك وقالك أنتَ كنت بتعمل كذا وكذا زمان قوله: كل إنسان فينا عنده أخطاءه لكن الأفضل هو اللي بيحسن من نفسه وأنا كنت سالب مليون وبقيت موجب واحد وأنا مش زعلان إني غلطت لإني أتعلمت ومفيش دروس ببلاش🤸👊🏻. 

⚪الخذلان: 

أنا مش قادر أكمل من غير الشخص الفلاني🤦🏼‍... ناس كتير بتوقف حياتها على ناس سابتها ومشيت طيب أنتَ موقف حياتك دلوقتي وهما بيكملوا حياتهم عادي، أنت زعلان ليه على ناس مشيت ولو فيهم خير كانوا قعدوا الدكتور إبراهيم الفقي قال كلام جميل في الموضوع ده: ( لو تمسك في أي إنسان عايز يسيبك هتفقد حياتك بحالها عمرك ما تكون خيال مآته لأي إنسان طالما شخص قرر يسيبك وأنت عايزه يقعد معاك بالعافية يبقى لازم تتنازل وكل مره تتنازل هتتنازل زيادة لغاية ما تلاقي نفسك أصبحت خياله فأصبحت ميتله فأنت مت لمين أخيرًا أو على وشك إنك تموت لمين حاليًا عمرك ما تموت لحد أناني مهما كان. ستقابل أشخاص وأماكن و أشياء و أحداث وظيفتها أن تساعدك فقط في هذه المحطة من حياتك وليس لتكملة المشوار بأكمله لذلك حان الوقت أن تدعهم وشأنهم). 

⚫موت شخص عزيز:

 الموت سنة الحياة ومن حقك تزعل وعمر ما حد بينسى حد كان بيحبه لكن لازم تكمل، تكمل وتخليك عارف إن الشخص ده خلص مهمته لكن أنت لسه والشيخ الشعروي ليه كلام رائع في الوضوع ده بيقول: (آفة الناس أنهم عندما يحددون أهدافهم يقعون في اعتبار ما ليس بالهدف هدفًا وغاية. وما دام هناك من يعتبر غير الهدف هدفًا فلابد من حدوث اضطراب وضلال، فالذي يعتبر أن الحياة هي الهدف، فهو يريد أن يحقق لنفسه أكبر قدر من اللذة فيها. أما الذي يعرف أن الهدف ليس هو الحياة، إنما الحياة مرحلة، نسأله.. ما الهدف إذن، فيقول: إنه لقاء الله والآخرة... وعندما يموت شخص عزيز علينا لماذا نحزن والله قصر خطوه إلى الهدف فإن كان موفق لخدمة هدفه فإننا نفرح له و نحزن فقط إذا لم يكن موفقًا في سيره لهدفه،فإننا إن أحسنا استقبال ما يقضي به الله في خلقه عرفنا أنه حكيم وأنه رحيم )  

تقبل موت الشخص ده ولو هو مات فهو مش هيموت في قلبك، وحزنك مش هينفعه فيه حاجات هتفرحه أكتر ذي دعاءك وصدقتك. 

2ـ الحاضر 

🔴سامح: مش هتعرف تعيش الحاضر غير لما تسامح طول ما أنت شايل في قلبك كره للناس مش هتقدر تعيش اللحظة فحرر نفسك من كره الناس دي وخليك عارف إن ربنا مش بيسيب حق حد بس أنت أنسى الناس دي، وأنسى أذيتهم علشانك مش علشانهم ربنا بيسامحنا على ذنوب كتير بنعملها فخليك أنت كمان بتسامح ربنا بيقول:(وَلْيَعْفُواْ وَلْيَصْفَحُوٓاْ ۗ أَلَا تُحِبُّونَ أَن يَغْفِرَ ٱللَّهُ لَكُمْ ۗ وَٱللَّهُ غَفُورٌ رَّحِيمٌ). 

🔵فكر بشكل إيجابي: التفكير بشكل سلبي هيخليك تعيش لحظات كئيبة جدًا فحاول تغير تفكيرك وتفكر بشكل كويس 🤸

⚪الامتنان: من كتر ما أحنا بقينا متعودين على النعم بقينا بنشوف الحياة مملة ومفيهاش أي متعة. جرب الامتنان وصدقني حياتك هتغيير تمامًا ربنا سبحانه وتعالى بيقول:(ولئن شكرتم لأزيدنكم) و في دراسات أثبتت إن الأمتنان بيزيد من معدل السعادة والامتنان بيكون لله وللناس برضو لإن الرسول بيقول:( من لم يشكر الناس لم يشكر الله) . 

⚫الحاضر هيبقا ماضي: أنت بتندم على الماضي طيب ما الحاضر اللي أنتَ بتضيعه هيبقى ماضي فلازم تستغل الحاضر لصنع ماضي وذكريات حلوه وكمان لصنع مستقبل حلو 💜

🔴الفراغ قاتل:إياك والفراغ! فيه حاجات كتير ممكن تعملها في يومك أوعا تبقى فاضي لإن الفراغ بيسحبك للتفكير في الماضي والتفكير في المستقبل ولوساوس الشيطان ولعمل ذنوب أنتَ في غنى عن سيئاتها فاملأ وقتك بحاجات مفيدة. 

3ـ المستقبل 

🔴الخوف من المستقبل: خايف من المستقبل ليه وهو مش بإيدك أصلًا 💬هتقولي خايف من حاجات كتير ممكن تحصل في المستقبل هقولك🗯 طيب أنتَ ضامن إنك تعيش لثانيه تاني قدام... الموت ممكن يجي للإنسان في أي لحظة وصدقني طول الأمل مهلك إنك تفكر بشكل سلبي لعشر سنين قدام دا مش حل ،والحل إنك تعيش اللحظة بتاعتك ومتفكرش في الشئ السئ اللي بيخوفك وكل ما يجي على بالك قول أنا هعيش اللحظة دي لإني مش ضامن إني هعيش للحظة تاني وصدقني دا حل جميل جدًا، تاني حاجة ممكن تعملها للتغلب على الخوف من المستقبل إنك تتوقع أسوأ سيناريو للحاجة دي وتلاقي أنسب حل للسيناريو السئ ده وكدا أنت هتفضي عقلك من التفكير في الموضوع ده لإن حتى لو أسوأ سيناريو حصل فأنت معاك حل ليه وصدقني أسوأ سيناريو مش هيحصل لإن دي لعبة من لعب الشيطان علشان يخليك متعملش أي شئ في حياتك. 

🔵حسن الظن بالله: لو أنت مؤمن بجد هتعرف إن ربنا مش بيسيب حد لجأله ولذلك خلي عندك حسن ظن بالله وأتوقع المستقبل بشكل كويس وصدقني ربنا هيخليه أجمل مستقبل بس أنت ثق بالله. على بن ابي طالب بيقول:(كل متوقع آت فتوقع ما تتمنى) . 

◀️اتمنى البوست يكون مفيد بالنسبالك و ️️لو عندك أي مشكلة أو أي سؤال أكتبه في التعليقات وهرد عليك💬

◀️لو أنت حابب المحتوى اللي بقدمه متنساش تعملي متابعة  علشان يوصلك كل حاجة بنزلها. 

سلام بقا💜🌷

دعاء القناوي

اقوى مقالة عن موقع لينكد ان خلاصه تجربتى اكثر من 50000 متابع

https://bit.ly/3o3YcJ4