عمرك 20 سنه ابدا مشروعك! كيف تبدا مشروعك في عمر العشرين؟ اهم 5 نصائح لكي تبدأ مشروعك في سن صغير!
المقدمة :
بسبب موجه رياده الاعمال كتير بيفكر ليه اشتغل عند غيري؟ لما ممكن اعمل مشروعي!
وسن ال 20 بالرغم من انه سن صغير الا انه مناسب جداً ان يكون عندك مشروعك الخاص، في المقال ده هنتكلم عن اهم 5 نصائح اللي لازم تلتزم بها عشان مشروعك ينجح. فلو انت شاب عندك 20 سنه اقل او اكثر حاول تتبع الخطوات دي عشان تنجح في مشروعك.
اول نصيحه : الاستعانة بالله
ثاني نصيحه : صدق ولا تتكاسل
ثالثه نصيحه : ركز على بناء علاقات مثمره في مجالك
رابع نصيحه : الخبره ليها دور
خامس نصيحه : ابدا مشروع صغير جداً
يلا نبدا
اول نصيحه : الاستعانة بالله ;
(وَدَلِيلُ الاسْتِعَانَةِ؛ قَوْلُهُ تَعَالَى: ﴿ إِيَّاكَ نَعْبُدُ وَإِيَّاكَ نَسْتَعِينُ ﴾ [الفاتحة: 5]، وفي الحديث: (إذا اسْتَعَنْتَ فَاسْتَعِنْ بِالله) [1].
و الاستعانة بالله وتفعيل النيه لله فكل خطواتك هيعود عليك بالنفع دنيا وآخره.
والاستعانة بالله جل وعلا تتضمن ثلاثة أمور:
الأول: (كمال الخضوع والتذلل لله تعالى) .
والثاني:( الثقة بالله جل وعلا، واعتقاد كفايته) .
والثالث: (الاعتماد على الله سبحانه وتعالى، وتفويض الأمر إليه، وهذه لا تكون إلا لله جل وعلا، فمن استعان بغير الله محققًا هذه المعاني الثلاثة، فقد أشرك مع الله غيره).
ثاني نصيحه : صدق ولا تتكاسل :
اللي بيصدق نفسه وحلمه وبيسيبه من كلام الناس بسيبه من اي فكر سلبي ممكن يوقفه عن هدف شاف فيه نفسه، عمره ما هيوصل، عمره ما هيكون، ولا حتى عمره ما هيقدر يسيب علامه، لانه كل ما بيفكر في شيء بيحط حساب لكلام الناس، بيحط حساب للفشل والأفكار السلبيه انها توقفه، فهيفضل دايما خايف.
كذلك اللي بيتكاسل، اللي بيكون قدامه الامكانيات اللي تساعده وعنده الناس اللي تدعمه، بس واخد في عقل باله مصطلح التسويف او التكاسل، بكره، لما الظروف تتعدل، اخلص المصلحه الفلانيه، دا كمان صعب انه يوصل.
عشان كده استعين بالله وحقق معني الاستعانه واوعا تسلم دماغك وفكرك لغيرك، أو لأي افكار سلبيه تعجزك، واوعا تتكاسل هتحقق احلامك وتنتصر علي نفسك. ولل صراحه المقاله كانت عباره عن 3 نصائح اللي جايه من وجهة نظري هي اهم نصائح لان النصائح كتيره ومش بتخلص بس اللي يطبق، لكن حد حبيبي قالي دول اول حاجه قولتله فعلآ وضيفتهم للمقال. لان دول الاساس ;الاستعانه بالله وصدق نفسك ولا تتكاسل.
ثالث نصيحه : ركز على بناء علاقات مثمره في مجالك:
العلاقات ليها دور مهم جدا في ان مشروعك ينجح فلو انت ناوي تدخل مشروع معين ومش عندك علاقات كافيه عمرك ما هتنجح، تجارب الناس السابقه مهمه عشان نتعلم منها، عشان ما نقعش في نفس الاخطاء.
مهم جدا يكون عندك حد ذو خبره تنهل منها وتستفيد من تجاربه، حد تقوله ناوي اعمل واحد اتنين تلاته، فيقولك رأيه بايه الصح واي الغلط؟ اي اللي ممكن تسبدله مكان الحاجه اللي انت عايزها وتوصلك لنفس النتيجه.
وممكن كمان يقولك علي خطوه ترفعك سلمتين بدل السلمه الواحده.
الناس عامة في حياتنا مهمين، فلو اختارنا ناس في نفس مجالنا، واثقين من رأيهم، هنوفر علي نفسنا سنين كتيره من الفشل.
النصيحه الرابعة :الخبره ليها دور :
انا لو داخل مشروع جديد ومش عندي فيه خبره فالأزمات اللي أنا ممكن أتعرض ليها اكتر بكتير من الازمات اللي ممكن أتعرض ليها لو انا صاحب خبره، عشان كدا لازم اتعلم وبشكل مستمر عن مشروعي، اعرف الحاجات القديمه للمشروع واي اللي منها ممكن يتواكب مع الوقت الحالي لمشروعي واي اللي لازم استغني عنه، واتابع اخبار مشروعي واشوف التجديد اللي بيطرأ عليه في عصرنا الحالي، اقارن نفسي بالمنافسين هما بيعملوا اي انا بعمله؟ وبيعملوا اي مش بعمله؟ واي الصح واي الغلط.
الخبره مش بتيجي بس من القراءة مع ان القراءة مهمه عشان علي الاقل هتعرفني اساسيات المشروع اللي انا حابب اني اشتغل عليه؛ ولكنها مش كافيه! _لازم احتك بالناس واخد من خبراتهم، واقارن نفسي زي ما قولنا ب المنافسين، ومع الوقت هبني خبارتي الخاصه بيا واللي بعدين اقدر انا افيد بيها غيري لأننا بنتعلم من بعض.
النصيحه الخامسة : ابدا مشروع صغير جداً :
بلاش تدخل بقلب حامي، ادي نفسك والزمن فرصه يعلمك، والله مشي معاك الموضوع والحمد لله، افكر اكبر مشروعي، ماماشيش يبقي الخساره ساهله واقدر اتحملها، ويبقي معايا سيوله أصلح بيها الغلط لو يتصلح، او اجرب اشوف نفسي في حاجه تاني مجال تاني .
لكن المخاطره من البدايه مش حلوه، كمان يستحسن لو هتغامر يبقي اعمل مشروعين في نفس المجال او مرتبطين ببعض او مش في نفس المجال المهم يكون عندي خبره ولو بسيطه بكل واحد فيهم، بحيث لو نحج معايا واحد وخسرت واحد، اشوف هل هكمل في المشروع اللي خسرت فيه، بعض ما اعوض الخساره واعرف أخطائي ولا هكمل في المشروع التاني.
في كلا الحالتين يا صديقي انت لازم تبقي عارف أن المغامره حلوه، بس احنا في بداية العمر، فنقول يا هادي ونستعين بالله ونبدأ وربنا يوفقك ويوفقني آمين.
وحاجه ليك وللزمن، اذا ربنا انعم عليك بأي علم او خبره في مجالك، اوعا تبخل بيها علي حد لسه بيبدأ وافتكر ان انت كنت في نفس المكان وكنت محتاج اللي يساعدك، وفعل النيه لله في كل خطواتك وربنا يكرمك آمين.
ودي مقالات اظن انها هتفيدك :
. الوصايا السبعه لطلاب الجامعه هنا
. 9 نصائح ليك كفريلانسر مهم انك تعرفها من هنا
. ما الفرق بين عقليه الغني وعقليه الفقير؟ دليلك لتحقيق الحريه الماليه! من هنا
. الجزء الاول : تطوير الذات : 22 فكره عمليه لتطوير نفسگ لكي تكون الشخص الذي تريده؟ من هنا